Einar Sveinbjörnsson veðurfræðingur birti í dag hugleiðingar sínar um hið nýja norm í loftslagsmálum.
“Í dag greina íslenskir fjölmiðlar frá miklum hitum sem geisað hafa í suðvestanverðum Bandaríkjunum, Mexíkó og beggja vegna Miðjarðarhafsins. Ástand sem varað hefur að undanfarnar vikur. Einnig í Mið-Austurlöndum og austarlega í Kína og í Japan. Fjölmörg hitamet hafa fallið.
Segja má að þetta sé nýr raunveruleiki og eldri meðaltöl og viðmið eiga ekki lengur við.
Alþjóða Veðurfræðistofnunin minnir á með tilkynningu í dag að hitabylgjur að sumari sú að verða algengari, lengri og svæsnari en áður.
Vísað er í nýjustu vísindaskýrslu IPCC þar sem segir að um 2050 muni um helmingur íbúa í Evrópu standa frammi fyrir mikilli hættu á ofsahita að sumrinu (e. high risk of heat stress).
Augljóslega einkum íbúar í suðurhluta álfunnar.
Með fylgir hitaspáin fyrir daginn í dag frá ECMWF og hún er bísna lýsandi fyrir ástand mála.
Þessi nýji veruleiki dregur með margvíslegum hætti úr lífsgæðum þeirra sem áfram kjósa að búa eða dvelja að sumrinu á þessum slóðum. Vafalítið munu fjölmargir margir á næstu áratugum freista þess að flytja norður á bóginn í tempraðra loftslag.
Slíkt viðbragð væri dæmigert fyrir aðlögun að loftslagsbreytingum”.
Mynd/af facebooksíðu Einars Sveinbjörnssonar
