HORFIN ERU HÚS OG HEILL ÆSKUHEIMUR! 2 HLUTI. 60 MYNDIR

Siglufjörður er líklega það bæjarfélag á Íslandi sem útlitslega hefur breyst mest. Það sem við sjáum með okkar fullorðnu augum í dag er eitthvað svo ótrúlega mikið öðruvísi en það sem við ólumst upp við. Reykjavík hefur vissulega breyst mikið en þær breytingar snúast mest um að borgin hefur stækkað í allar áttir. Á Siglufirði eru horfin hús, verksmiðjur, brakkar og bryggjur óteljandi og mest lítið hefur fyllt upp í auðu sárin í bæjarskipulags myndinni.

Það sem hefur þó komið í staðin er samt fallegt og passar vel inn í ímynd og sögu Siglufjarðar.

Í seinni hlutanum förum við víða um völl og höldum áfram að kíkja á myndir úr horfnum æskuheimi. Við förum t.d. niður á Hafnarbryggju, útí Bakka, framá fjörð og svo förum við yfrum í lokin. Myndirnar og myndaskýringartextar tala sínu eigin máli.

ATH. Ef þið smellið á mynd í greininni er hægt að fletta ljósmyndunum fram og til baka. En auðvitað er skemmtilegast að skoða alla söguna í heild sinni. Ef þú, lesandi góður, villt skoða myndirnar betur með því að stækka þær er best að fara beint inn á vefinn trolli.is og finna greinina þar. Ef slóðin er opnuð í gegnum Facebook getur verið lokað á að skoða myndirnar í stærra formi.

HAFNARBRYGGJA, GRÁNA, RAUÐKA OG SLIPPURINN…

… og allt þar um kring hafa orðið gríðarlegar breytingar þar sem stórar og miklar byggingar hafa horfið og orðið tímans tönn að bráð.

Tjarnargata og Hafnarbryggjan. Mörg horfin hús á þessari mynd. Ljósmyndari: Steingrímur Kristinsson.

Hafnarhúsið. Ljósmyndari: Steingrímur Kristinsson.

Tunnufarmurinn er hærri en sjálft Hafnarhúsið. Ljósmyndari: Kristfinnur Guðjónsson.

Hafnarhúsið illa leikið eftir óveður veturinn 1966. Það var stundum kallað **Skagfirðingaveðrið**, vegna þess að þorrablót Skagfirðinga var eða átti að halda þegar þetta veður skall á. Ljósmyndari: Steingrímur Kristinsson.

Hafnarbryggjan. Ljósmyndari: Steingrímur Kristinsson.

Gránufélagshúsið (GOOS-húsið) þegar það var uppá sitt besta. Ljósmyndari: Snorri Stefánsson.

Grána og strompurinn frægi. Ljósmyndari: Ólafur Thorarensen.

Grána. Ljósmyndari: Kristfinnur Guðjónsson.

Gráunfélagsbrakkinn. Ljósmyndari óþekktur.

Rauðkusvæðið og nágrenni. Ljósmyndari: Steingrímur Kristinsson.

Hægt er að sjá fleiri skemmtilegar myndir frá Rauðku svæðinu í þessari myndasyrpusögu.

KAÐLA OG KLIFUR ÆVINTÝRA MYNDASYRPUSAGA

Rauðkusvæðið séð frá Tjarnargötu. Ljósmyndari: Steingrímur Kristinsson.

Gamla Slippstöðin. Flóabáturinn Drangur, uppi í slippnum. Ljósmyndari: Steingrímur Kristinsson.

Slippurinn og nágrenni, það mesta er nú horfið undir sjávarvarnargarða og uppfyllingar.

Við Slippinn. Ljósmyndari: Steingrímur Kristinsson.

SR SVÆÐIÐ…

… og allt það umhverfi hefur breyst mikið.

SR verksmiðjur og bryggjur. Ljósmyndari: Steingrímur Kristinsson.

SR Löndunarkranar og síldarplön í bakgrunninum. Ljósmyndari: Steingrímur Kristinsson.

SR bræðsluverksmiðja. Ljósmyndari: Steingrímur kristinsson.

Hægt er að sjá fleiri myndir frá SR svæðinu og nágrenni hér í myndasyrpusögunni um Hrímnir HF.

HRÍMNIR H/F. SÍLDARTUNNUR UPPÁ ÞAKI OG SUNDLAUG Í KJALLARANUM. 35 myndir

TÚNGATA OG NÁGRENNI

17 Júní skrúðganga á Túngötunni. Ljósmyndari: Kristfinnur Guðjónsson.

Norður hluti Túngötu við gatnamót Ránargötu. Ljósmyndari: Steingrímur Kristinsson.

Ásgeirsbrakkinn við Túngötu 4?. Ljósmynd: Hjörtur Karlsson.

**Upplýsingar frá Helgu Ottósdóttur:** Þessa mynd tók Jón Kristján móðurbróðir minn þegar hann var í sinni árlegu sumarheimsókn til mömmu sinnar ( ömmu Jónu) líklega ‘55 eða ‘56 Ég, vel uppfærð og glaðhlakkaleg í fínum “skoskum” heimasaumuðum kjól (eftir mömmu) með slaufu í ljósu hárinu. Mér þykir vænt um þessa mynd, kanski vegna þess að ég man eftir þessu. Ég sný baki í húsin sem stóðu fyrir norðan okkar hús i Túngötu 20. Ég er næstum viss um að ekki eru til margar myndir af þessum húsum, sem nú eru löngu horfin í tímans vél. Í hvíta húsinu í bakgrunninum bjó Jón Víglundsson ásamt móður sinni Maríu.

Jóakim Ottósson með nýju gormabindinga skíðin, stendur á hlaðinu bakatil við **Túngötu 20**. Í baksýn er gamla góða Alþýðuhúsið. Það var oft á snjóþungum vetrum rennt sér á skíðum eða sleðum ofan af þaki hússins. Myndin er líklega síðan 1958 -59. Ljósmyndari óþekktur. Upplýsingar og ljósmynd lánuð frá Helgu Ottósdóttur.

Túngata 22 í niðurníðslu. Ljósmyndari: Steingrímur Kristinsson.

Rétt fyrir ofan gatnamótin Túngata/Þormóðsgata, stóð þetta stóra hús, oft kallað Sölvahús í denn og fékk fótbolta frá gamla Malarvellinum í andlitið alla daga sumarsins. Stóra húsið Hólakot til hægri stendur enn. Pistlahöfundur man ekki hvort að þetta hús var skráð á Hvanneyrarbrautina eða Þormóðsgötuna? Ljósmyndari: Steingrímur Kristinsson. (Viðbótarupplýsingar frá Jóni Karlssyni. “Myndin af Sölvahúsi, þar sem afi minn og sonur hans Björn bjuggu var **Þormóðsgata 18.**“

**Gatnamótin Túngata/Ránargata.** ATH. Stóra fallega Fógetahúsið með tilheyrandi túni í bakgrunninum.Þar fyrir ofan, horfið hús, sem lengi vel var notað netaverkstæði, minnir mig. Ljósmyndari: Steingrímur Kristinsson.

**Gamla bensín/biðreiðastöðin við Túngötu.** Upplýsingar frá Steingrími Kristins: “Ég fæddist í stóra steinhúsinu í bakgrunninum til hægri , en pabbi minn, þá aðeins 19 ára, byggði þetta hús með takmarkari aðstoð bróður síns Garðars Hannessonar (föður Hannes Boy) Fjölskyldan flutti inni í neðri hæðina rétt fyrir jólin 1933 og þar fæddist ég í febrúar 1934.” Ljósmyndari: Steingrímur Kristinsson.

ÚTÍ BAKKA

Hvanneyrarkrókurinn og gamla Smurstöðin. Ljósmyndari: Steingrímur Kristinsson.

Gamla Shell bryggjan. Gamla sjúkrahúsið, prestsetrið Hvanneyri og Rafstöðin í bakgrunninum. Ljósmyndari: Kristfinnur Guðjónsson.

Þarna á bakkanum var lengi vel óyfirbyggð sundlaug. Ljósmyndari óþekktur.

Sundkennsla útí Bakka. Ljósmyndari óþekktur.

Bakki. ATH. takið eftir veg í fjallinu upp að gamalli grjótnámu. Fjárhús lengst til hægri. Ljósmyndari: Kristfinnur Guðjónsson.

Upplýsingar frá Steingrími Kristins: **Brennandi hús í Bakka**, þar var áður verbúð söltunarstöðvar Óskars Halldórssonar, þar hóf ég minn búskap 1953 minnir mig.
Húsið var notað til brunaæfingar árið 1984 og brennt til kaldra kola

Íshúsið Bakki. Ljósmyndari: Steingrímur Kristinsson.

Bakki og bryggjur í Hvanneyrarkróknum. Ljósmyndari óþekktur.

UPPÁ BREKKU…

…var heilmikið fjárhúsahverfi.

Fjárhúsahverfi. Ljósmyndari: Steingrímur Kristinsson.

Byggingarvinna við hitaveitutanka, fjárhús og Brekkuhverfið í bakgrunninum. Ljósmyndari: Steingrímur Kristinsson.

Fjárhús og í vinstra horni, húsið hennar Stínu á Túninu, en hún og dóttir hennar bjuggu bókstaflega á túninu, því það lá lengi vel engin gata að húsinu. Tilheyrir samt miðjuhlutanum af Hávegi. Ljósmyndari: Steingrímur Kristinsson.

Sjá fleiri myndir og sögur frá þessum bæjarhluta hér:

GÖNGUTÚR UM HEIMAHAGA. 3 hluti, ÖMMUR
sksiglo.is | Greinar | 10.03.2017 | Jón Ólafur Björgvinsson | Lestrar 1253

UNDIR HAFNARGÖTUBAKKA OG FRAM Á FIRÐI…

… hefur margt og mikið breyst og þarna undir bakkanum voru líka langstærstu síldarplönin, stundum spiluðum við fótbolta þarna snemma á vorin. Snjórinn bráðnaði oftast fyrst á þessum risastóru plönum.

Bryggju-knattspyrna á eyrinni við Söltunarstöð Kristins Halldórs. Ljósmyndari: Þórdís Jóhannesdóttir.

NÖF. Mörg horfin hús hér. ATH. Á milli húsanna sést í lítinn kofa á horni á Suðurgötu og Hafnargötu. Þetta gæti verið vinnuskúr sem langafi minn Sigurður í Leyningi byggði. Ljósmyndari óþekktur.

Síldarplan Skafta á Nöf var stórt og mikið og plönin þar sunnan við enn þá stærri. Ljósmyndari: Steingrímur Kristinsson.

Söltunarstöðin Nöf og bryggjur. Ljósmyndari: Steingrímur Kristinsson.

Ísfirðingaplan og Landmarkshúsið stóra í bakgrunninum. Ljósmyndari: Steingrímur Kristinsson.

Landmarkshúsið stendur enn á sama stað við Hafnargötuna. Ljósmyndari óþekktur.

Séð framá fjörð. Skreiðarhjallar og heysátur í bakgrunninum. Hafnartún 2-6 til í byggingu *(myndin er líklega tekin sumarið 1966)* og þar sunnan við hesthús/fjárhús Helga Dan og stórir tunnustaflar undir Hafnargötu bakkanum. Ljósmyndari: Steingrímur Kristinsson.

Hafnartún 2-6, fyrir framan nr. 6 sem í nóvember 1967 verður heimili pistlahöfundar, stendur gamli Gráni Hrímnisvörubíllinn. Ljósmyndari: Steingrímur Kristinsson.

Snorragata. Svarti skúrinn og stóra horfna “Beinið” sem lagðist á hliðina í miklum vetrarstormi í bakgrunninum. Ljósmyndari: Steingrímur Kristinsson.

Leikskálar. Margir eiga sér skemmtilegar barnæskuminningar tengdum þessu húsi sem hvarf í stóru snjóflóði. Ljósmyndari: Kristfinnur Guðjónsson.

**Skíðaborg.** Skíðaskáli Nýja félagsins og var hann norðan og ofan við Steinaflati, en seinna sameinaðist Nýja og Gamla félagið í Skíðafélagið Skíðaborg Siglufirði. Óskar Sveinsson teiknaði húsið, og var byggt af sjálfboðaliðum þ.m. Helga Sveinssyni og fl. Húsið fauk seinna af grunninum og eyðilagst af þeim sökum. Ljósmyndari:
Haraldur Sigurðsson.

Slysavarnaskýlið í Skarðinu. Ljósmyndari: Steingrímur Kristinsson.

FYRIR HANDAN FJÖRÐ…

… urðu miklar breytingar þegar að flugvöllurinn var lengdur. Þar hvarf meðal annars merkilegt hálfbrunnið hús.

Í forgrunninum sjámum við Skútu sveitabæinn, gamla skátaheimilið lengst til vinstri og í bakgrunninum þil sem marka byrjun Leirutanga og þar á sama stað mótar fyrir gamalli bryggjueyju sem var kallað Annleggið. Ljósmyndari: Kristfinnur Guðjónsson.

Árós. Bústaður Magga á Ásnum. í bakgrunninum nótabátar, reiðvöllur hestamanna og hús Nörgaard. Ljósmyndari: Steingrímur Kristinsson.

Þetta er hús og bú Aage Nörgaard, verkamaður við virki sitt Norðurgarður á Siglufirði, hús hans í bakgrunni. ATH. Takið eftir einkennilegu formi hússins, sem hann kveikti í þegar hann flutti heim til Danmerkur, en bænum var boðið að kaupa eignina, sem var afþakkað. Þessi maður var dugnaðarforkur, vann hjá SR, seldi hænuegg, kjúklinga og ýmsa garðávexti. Ljósmyndari: Kristfinnur Guðjónsson

Aage Nörgaard við garðrækrar múrinn sinn og hús. Allt þetta byggði hann sjálfur, einhentur maðurinn. Ljósmyndari: Kristfinnur Guðjónsson.

Sagan segir að einhver málaferli hafi orðið út af þessari íkveikju á eigin eign og að þessi maður hafi málað heilmikið níð um Ísland á húsgaflinn hjá sér úti í Danmörku. Hann mun einnig hafa skrifað sérkennilega þéttskrifað þakklætis “dulmálsbréf” sem hann sendi til Magga á Ásnum, vinar síns og fyrrverandi nágranna.

Fleiri myndir og sögur úr horfnum ævintýraheimi framá friði má sjá hér:

Horfin ævintýraheimur: Skoger, Evanger, Tordenskjold… og ég! 1. hluti

HORFIN ÆVINTÝRAHEIMUR: SKOGER, EVANGER, TORDENSKjOLD… OG ÉG! 2. HLUTI

AÐ LOKUM…

… tvær skemmtilegar myndir af dularfullu húsi og kofa sem pistlahöfundur getur ómögulega staðsett við neina götu og hugleiðingar um framtíðina.

Lína Langsokkur á Sigló? Ljósmyndari og hús óþekkt.

Óþekktur kofi á staurum og tvær óþekktar dömur. Ljósmyndari óþekktur.

Í framtíðinni verður sagan okkar að búa sýnileg með okkur líka.
Okkur ber öllum skylda til að varðveita hana sameiginlega og sýna henni þá virðingu sem hún á skilið. Það er dásamlegt að ganga um götur Siglufjarðar og sjá hvað allir eru að mestu leyti sammála um hvernig á að varðveita hús og endurbyggja gamalt umhverfi og gefa því ný hlutverk í okkar nútíma.

Pistlahöfundi er einnig oft hugleikið hvað litadýrð bæjarins er einstök og öðruvísi.
Þarna hafa margir tekið eftir þeim stíl sem snillingurinn Jón Steinar ýtti úr vör fyrir mörgum herrans árum síðan.

Sjá meira hér:

Snillingar bæjarins! Jón Steinar setur lit á bæinn
sksiglo.is | Okkar fólk | 23.07.2014 | Jón Ólafur Björgvinsson | Lestrar 1812

Það er einnig augljóst fyrir pistlahöfundi að hægt er að fylla upp í gömul tómarúm sem eldri horfin hús hafa skilið eftir sig með því að byggja nýtt í gamaldags stíl.

Hér er gott DÆMI frá Hafnargötu 4.

Frábærlega vel hannað hús við Hafnargötu 4. það er bæði Siglfirskt og Skandinavískt. Það er eins og að þetta hús hafi alltaf staðið þarna. Ljósmyndari: Jón Ólafur Björgvinsson.

Sjá einnig meira hér um ýmis hús og liti.

Furðulegar götur 4 hluti – Hús

Það er einnig æskilegt að sett verði upp fleiri ljósmyndasöguskilti við sjávarsíðuna og víðsvegar um eyrina eins og gert hefur verið t.d. neðan við Síldarminjasafn Íslands.
Ferðamenn og jafnvel bæjarbúar sjálfir geta ekki án mynda ímyndað sér eða séð fyrir sér allar þær breytingar sem hafa átt sér stað í okkar fagra firði.
Það er vinsælt í dag að á slíkum upplýsingaskiltum séu svokallaðir “QR taggar/slóðir” sem vísa á heimasíður með fleiri myndum og sögum úr sama umhverfi.

Einu framtíðaráhyggjur pistlahöfundar snúast um hugmyndir og skipulagsbreytingar varðandi hluta af umhverfi Ráðhústorgsins og það kom skýrt fram að þeir sem tjáðu sig mest í spjallþráðum eftir birtingu seinni hluta myndasyrpusögunnar um Torgið okkar fræga voru að mestu leyti ekki búsettir í bænum.

“FRAMTÍÐ TORGSINS OKKAR?
Greinarhöfundi hefur borist til eyrna að stórar og miklar og nú þegar samþykktar framtíðar áætlanir séu til um TORGIÐ okkar og að það séu mjög svo skiptar skoðanir meðal bæjarbúa um ágæti þessara framtíðar drauma.

Persónuleg finnst mér að syðri hlutinn á skipulagsplaninu sé bara nokkuð góð lausn á ofannefndu vandræðagatnamóta málefnum.
Þessir möguleikar eru nú þegar til staðar eftir að Egilssíldarhúsið hvarf og sagt er að við viljum ekki lengur hafa tjaldstæðið inn í miðjum bæ.

En þetta með að Torgið verði skorið niður í Pizzusneið er fáránlegur óþarfi til þess eins að skapa meira ljótt malbik og fleiri bílastæði og það eitt er líka algjör helgispjöll á þessum heilaga stað.

Þarna er í mínum huga verið að yfirgefa FERNINGA og “beina línu” hugmyndafræði Séra Bjarna sem einkenna allt skipulag í miðbænum og á allri eyrinni.”

Sjá teikningar og fleira hér:

RÁÐHÚS- TORGIÐ OKKAR FYRR OG Í FRAMTÍÐINNI… 2 HLUTI. MYNDA-SYRPUSAGA

Það er öllum ljóst að þeim sem þykir vænt um þennan fagra fjörð skipta þúsundum, en auðvitað hafa ekki brotfluttir eða sumarhúsa aðfluttir kosningarétt varðandi framtíðar skipulagsmál Siglufjarðar, en það skiptir okkur öll verulegu máli hvernig útlits og skipulagssaga bæjarins verður varðveitt og úr því að hægt var að fá bæjarstjórn til að skipta um skoðun þegar kemur að lausagöngu kattardýra í byggðarlaginu.
Þá hlýtur að vera hægt að ræða saman um framtíðarútlit Torgsins okkar allra, eða er það mál alfarið í höndunum á Vegagerð Ríkisins?

HORFIN ERU HÚS OG HEILL ÆSKUHEIMUR! 1 HLUTI. 55 MYNDIR

Siglósaknaðarkveðjur til ykkar allra.
Nonni Björgvins.

Höfundur og myndvinnsla:
Jón Ólafur Björgvinsson

Forsíðuljósmynd:
Steingrímur Kristinsson

Allar ljósmyndir eru birtar með leyfir frá Ljósmyndasafni Siglufjarðar.

Þakklætiskveðja til Steingríms Kristinssonar fyrir aðstoð, góð ráð og yfirlestur.

Aðrar sögur, myndasyrpur og pistlar eftir sama höfund finnur þú hér á trölli.is:
AUTHOR: JÓN ÓLAFUR BJÖRGVINSSON

Aðrar áhugaverðar nýlega birtar myndasyrpur og sögur með mörgum Siglfirskum minningum og myndum:

MINNINGAMYNDASAGAN SEM ALÞÝÐA ÍSLANDS SAFNAR OG SMÍÐAR

ÓSKABJÖRN OG MÚKKAR (AFASAGA)

SIGLÓ SÍLD! ÚR MYNDASAFNI BJÖRGVINS VERKSTJÓRA. 60 MYNDIR

FERÐIN UPP Í HAFNARFJALL