SPÁSSERAÐ Á GÖNGU-BRYGGJUM. 30 MYNDIR

“Göngu-bryggjur” finnst pistlahöfundi vera gott nafn á göngustígabryggjum sem ekki eru ætlaðar bátum.
Þær eru einungis gerðar til þess að auðvelda aðgang almennings á öllum aldri að fallegri strandnáttúru í Lysekil. Þetta er allt gert í sjálfboðavinnu gegnum félagið “Vinir Lysekils” og fjármagnað með styrkjum frá bæjarfélaginu, fyrirtækjum og einstaklingum.
Þyrlufélagið HeliAir flýgur t.d. ókeypis með efnið út í klettana til sjálfboðaliðana sem margir hverjir eru eldhressir eldri borgarar og nokkrir af þeim eru þrælreyndir alvöru bryggjusmiðir.

Það er dásamleg upplifun að ganga þarna um og upplifa kyrrð og ró frá bílaumferð og öðrum bæjarhávaða, sjá merkilegan strandgróður, tré sem skjóta rótum í klettagjótum og granítkletta sem skipta litum í fallegri sjávarljósabirtu.

Það sem grípur líka alla sem ganga þarna er ekki bara kyrrðin og náttúrufegurðin, heldur líka hversu mikil völundarsmíði þessi göngubryggja er. Bryggjudekkið er fellt að klettunum með mikilli nákvæmni, beygur og bogar látnir fylgja formi náttúrunnar. Með jöfnu millibili hafa bryggjusmiðirnir gert skemmtilega bekki, borð og jafnvel sólstóla þar sem fólk getur notið sín allan daginn í hafslautaferð.

Aðgegnin er með eindæmum góð, allt aðlagað þannig að auðvelt er að fara um svæðið með jafnt hjólastóla, göngugrindur sem og barnavagna.

Umhverfið og útsýnið út í skerjagarðinn er svo fallegt að maður hættir að vilja flýta sér og ósjálfrátt byrjar maður að rólegheita bryggju-spássera og horfa á náttúruna og fallega báta eins og maður gerði í sunnudags bryggju göngutúrum heima á Sigló í denn..

ATH. Hægt er að skoða myndirnar einar og sér og stækka með því að smella á hvaða mynd sem er og þá er hægt að fletta ljósmyndunum fram og til baka. En auðvitað er skemmtilegast að lesa myndaskýringartexta og aðrar sögur og útskýringar sem fylgja með.

**Upplýsingaskilti frá félaginu “Vinir Lysekils” um Lönguvíkur göngubryggjuna** sem var byggð í sjálfboðavinnu með drýgri hjálp frá ýmsum styrktaraðilum 2020-2021.
Eins og sjá má á myndinni hangir göngubryggjan sumstaðar í háum klettaveggjum.
Hér má sjá dæmi um aðra fræga “Göngu-bryggju”: **STRANDPROMENADEN i Uddevalla**

**Vegurinn að Lönguvíks baðströndinni** liggur i fallegri skógivaxinni brekku og nýja göngubryggjan sem var vígð nú í sumar, tengir saman og skapar dásamlega fallega gönguleið yfir í smábátahöfnina í Stóru Långevik og þar er hægt að sjá mikið af fallegum bátum.

**Hér sjáum við inn í Lönguvík og menn frá “Vinum Lysekils”** í sjálfboðavinnu við að byggja rúmlega 300 metra göngubryggju til viðbótar sem tengir baðströndina við næstu baðströnd í Álavík og svo seinna, áfram þaðan með áframhaldandi göngubryggju að Norður hafnarsvæðinu, en þar er stór og falleg smábátahöfn og skemmtileg kaffi- og veitingahús.

Þegar framkvæmdum líkur er ætlunin að almenningur getur gengið á smábátabryggjum og göngubryggjum nokkra kílómetra leið frá smábátahöfninni í Valbodalen (*lengst upp í mynd)* og notið útsýnis og útiveru alla leið að veitingasvæðinu í Norðurhöfninni. Mynd lánuð frá Goggle Maps.

SPÁSSERAÐ Á GÖNGUBRYGGJUM

Sjón er sögu ríkari…
… svo við látum bara ljósmyndirnar segja söguna.

Strax í upphafi tekur maður eftir því hvað þetta er falleg göngubryggja og mikil völundarsmíði og þarna var líka skemmtileg þakklætiskveðja frá leikskólabörnunum úr “Badhusbergets förskola” sem er staðsettur í nágrenninu uppi á Baðhúsaklettinum.

Siglfirski pistlahöfundurinn var í góðum höndum og undir leiðsögn hjá Sigurbjörgu Þ Óskarsdóttur. Hún Sibba býr þarna rétt fyrir ofan og hún hefur fylgst vel með framkvæmdum með því að spásserar daglega í þessu fagra umhverfi.

Hún er fædd og uppalin í síldarbænum Seyðisfirði og þar af fædd með góðan bryggjugöngu vana.